Говь-Алтай аймаг нь Монгол улсдаа газар нутгийнхаа хэмжээгээр 2 дугаарт орж, сүрлэг өндөр уулс, өргөн уудам говь, тал хоолой хосолсон дэлгэр сайхан нутагтай билээ. Дэлхийд ховордож, "Улаан ном"-д бүртгэгдсэн амьтан бүхий дуулсан хүн очиж үзмээр, үзсэн хүн хорогдож саатмаар Алтай сайхан нутгаас Эрхэм тантай интернэтийн орчинд уулзаж, мэндчилж байгаадаа талархалтай байна.

         Манай аймаг,  судалсан, судлагдаагүй арвин их нөөц баялагтай, газар нутаг нь онгон дагшин, хүн зон нь оюуны чадамжтай, уламжлалт ёс заншил, соёл ахуйгаа хадгалж үлдсэн нутаг билээ.

         Монгол улсын Ерөнхий сайд асан П.Жасрай “Говь-Алтай аймаг бол Монголын хөгжлийн задлаагүй үүц” гэсэн нь зүгээр нэг хэлээгүй зүглүүлж чиглүүлсэн санаа гэж ойлгох учиртай юм.

       Үүцээ зөв задалж, уул уурхайн баялагаас бүрдэх хөрөнгийг орон нутаг, төрөлх аймгийнхаа хөгжилд зориулж, ард иргэдийнхээ  cайхан амьдрах боломж бүрдүүлэх, бизнесийн салбарт таатай орчинг бий болгох нь бид бүхний эрхэм зорилго болж байна.

       Онгон төрхөө хадгалсан говь, хээр, хангай хосолсон үзэсгэлэнт байгаль, түүх соёлын дурсгалууд, эртний шим ертөнцийн үлдэгдэл бүхний аялал жуулчлалын тааламжтай орчин, уул уурхайн үйлдвэрлэл явуулах, ашигт малтмалын арвин их нөөц баялаг,  дэд бүтцийн салбарын эрчимтэй хөгжил, өөрийн хилийн боомт зэрэг давуу талаа ашиглан гадаад, дотоодын хөрөнгө оруулагчид, нутгаас төрөн гарсан төр нийгмийн зүтгэлтэн, бизнесменүүд, олон улсын хамтын ажиллагааны байгууллагууд, нутгийнхаа хөгжлийн төлөө сэтгэл санаа, оюун ухаанаа зориулагч хэн бүхэнтэй хамтран ажиллаж, Алтай нутгаа XXI-р зууны дэвшилтэт техник, технологийн хөгжлийн алхаанд хөл нийлүүлэн цэцэглүүлэн хөгжүүлэнэ гэдэгт итгэлтэй байна.

Та бүхэн говийн сайхан Алтай нутагт тавтай морилно уу...

       Хүндэтгэсэн,